Sot është dita e fundit e pushimeve të fëmijëve të cilët shkojnë në shkollë. Tek Shtëpia e Fëmijëve “Zyber Hallulli” janë rreth 40 fëmijë pa kujdes prindëror, të cilët shkojnë të gjithë në shkollën më të afërt të zonës “Osman Myrdeizi”.
Si rrallë herë, shohim përgatitjen dhe kushtet ku këta fëmijë marrin shërbime. Këto janë pjesë nga video-ja që po përgatitet për vitin e ri shkollor, ku shihen dy vogëlushë, të cilët këpusin lulet në oborr për mësuesen e tyre.
Shtëpia e fëmijës “Zyber Hallulli” është qendër rezidenciale, që ofron shërbim 24 orësh dhe 7 ditë në javë. Stafi është me turne, për t’iu përgjigjur nevojave të fëmijëve 24 në 24, sipas roleve të përcaktuara si psikolog, punonjës social, edukator, mjek, punëtorë higjiene, kuzhinier, mirëmbajtës, roje, etj.
Kushtet brenda këtyre ambienteve të japin ndjesinë e një shtëpie mjaft të ngrohtë. Aty marrin shërbim rreth 40 fëmijë, të cilët janë në moshë shkolle, 6-18 vjeç.
Specialistja e komunikimit, Suareza Nakuçi, tregon për “Tirana Today” për punën e madhe që bëhet nga stafi i këtij institucioni, në shërbim të fëmijëve. Pamjet në këtë video “flasin vetë”.
