Ylli i Ajax, De Ligt deri pak ditë më parë dukej se do të vazhdonte karrierën te Barcelona, ku do të bashkohej me shokun e skuadrës De Jong. Por tashmë kjo pistë sa vjen dhe zbehet, pasi ylli holandez është i lidhur me një kalim në Francë, te gjigantët e PSG.
Sipas holandezes “De Telegraaf”, nëna dhe e dashura e 19-vjeçarit të Ajax ishin për vizitë në Paris, ku vizituan rezidencat e mundshme, në njërën nga të cilat mund të vendosen, në rast se qendërmbrojtësi e përmbyll nënshkrimin me PSG.
Sipas medave holandeze vizitat në shtëpitë e mundshme janë bërë në fshehtësi të plotë dhe udhëtimi drejt Parisit është bërë me makinë me xhama të zinj. Madje, këto makina janë siguruar nga vetë klubi i PSG, siç raportohet nga Holanda.
E gjitha kjo nuk bën gjë tjetër, veçse ushqen tezën se kapiteni i Ajax është shumë afër mbylljes së marrëveshjes me kampionët e Francës. Nëse kjo ndodh, do të ishte një goditje e fortë për Barçën, sepse blerjen e De Ligt e konsideronte objektiv strategjik.
