Zbulohen detaje të reja lidhur me atentatin e sotëm në lagjen «Partizani» në Shkodër, ku u vra Fatos Ferracaku dhe mbeti i plagosur Fatmir Mehaj.
Vrasja ndodhi në afërsi të zonës së njohur si Markata. Ferracaku dhe Mehaj kanë qenë duke pirë kafe në një lokal, kur ka ndodhur atentati, nga dy persona që ndodheshin në një motoçikletë.
Mësohet se viktima Fatos Ferracaku, 31 vjeç është kushëri i afërt me biznesmenin Arjan Ferracaku, i vrarë më 1 shtator në një atentat.
Ndërsa Fatmir Mehaj është tregtar në tregun e Shkodrës. Atentati ka ndodhur vetëm pak metra larg vendit ku iu vendos tritol Lulzim Kullës, i njohur ndryshe si i forti i Shkodrës, tashmë i prangosur. Në vendngjarje janë gjetur 9 gëzhoja.
Motoçikleta që dyshohet se u përdor për atentatin nga autorët, është gjetur e djegur në zonën e Livadhes në Dobrac.
Ngjarja ka tronditur qytetin në një orë kur fluksi i lëvizjeve është i lartë.
Informacioni i policisë:
Shkoder
Informacion paraprak
Sot rreth orës 11:15 në lagjen “Partizani” në vendin e quajtur ‘Merkata Rus’, dyshohet se dy persona me motoçikletë kanë qelluar me armë zjarri në drejtim të shtetasit F.V. 31 vjeç, i cili ka ndërruar jetë në Spitalin Rajonal Shkodër.
Nga të shtënat është plagosur dhe shtetasi F.M., i cili ndodhet jashtë rreziku për jetën nën kujdesin e mjekëve.
Në vendngjarje ndodhet grupi hetimor dhe po punon për sqarimin e rrethanave të ngjarjes.
Policia e Shkodrës e mbështetur nga FNSH Shkodër ka ngritur pika kontrolli dhe në gjithë zonën ku dyshohet se janë larguar autorët.
Policia ka gjetur dhe një mjet motoçikletë të djegur, që dyshohet se u përdor nga autorët, në lagjen ‘Guerrile”.
Po punohet intensivisht për identifikimin dhe kapjen e autorëve.
Policia e Shkodrës fton çdo qytetar që ka informacion dhe mund të ndihmojë, të telefojnë falas në nr 112!
