Policia ka shoqëruar Mustaf Licin, anëtar i Partisë Mendimi i Djathtë Liberal në Këshillin Bashkiak të Shkodrës, pas vrasjes së Fatos Ferracakut.
Ai u shoqërua një ditë pas vrasjes, teksa efektivët e FNSH-së kanë rrethuar banesën e tij që në 06:00 të mëngjesit për ta shoqëruar më pas në ambientet e Policisë së Shkodrës.
Këshilltari Lici u mbajt në komisariat 8 orë, teksa është pyetur rreth vrasjes së Ferracakut dhe motorit që u gjet i djegur në afërsi të banesës së tij.
Megjithatë, Mustaf Lici ka mohuar te ketë lidhje me vrasjen, ndërsa ka thënë se nuk ka dijeni për autorët e mundshëm dhe se në momentin e krimit, ai ka qenë në Tiranë.
“Kur ka ndodhur ngjarja, kam qenë në Tiranë me deputetë të PD-së, në një mbledhje të zhvilluar atje”, është shprehur këshilltari i bashkisë. Pas shoqërimit, familjarët e tij nuk janë lejuar që të kenë asnjë lloj kontakti me të. Ata kanë kërkuar që t’i dërgojnë ujë dhe ushqime, por kjo gjë nuk është pranuar nga Policia.
