Presidenti Donald Trump ka shpallur gjendjen e emergjencës për disa ishuj dhe për shtetin e Floridës, teksa ishujt e Karaibeve janë në pritje të uraganit Irma.
Autoritetet kanë paralajmëruar për efekte “potencialisht katastrofike”, pasi uragani i kategorisë së pestë “Irma” konsiderohet të jetë stuhia më e fuqishme e Atlantikut në një dekadë dhe ka sjellë erëra me shpejtësi deri në 295 km/h.
Ishujt Leeward janë edhe pika fillestare nga ku uragani do të zbarkojë, për të vijuar më pas me Porto Rikon dhe Republikën Dominikane.
Shteti amerikan i Floridës ka urdhëruar evakuim të detyruar, pasi stuhia kërcënon të kalojë edhe atje, ndërsa banorët e ishujve i janë drejtuar dyqaneve për t’u furnizuar me mallrat për të përballuar uraganin.
Trump ka shpallur gjendjen e emergjencës për Floridën, Porto Rikon dhe Ishujt e Virgjër amerikanë, për të cilat ka mobilizuar edhe përpjekjet federale për lehtësimin e fatkeqësive.
