Ish-trajneri i Partizanit, Sulejman Starova ka marrë drejtimin e ekipit të Superligës së Kosovës, Ferronikelin. “Bobi” u shkarkua nga të kuqtë pak ditë më parë, pasi nuk arriti rezultatet e pritura, po ashtu drejtuesit u shprehën të pakënaqur për nga merkaton e janarit. Drejtimin e mori zëvendës trajneri Klevis Dalipi. Nuk ishte hera e parë që Starova merrte drejtimin e Partizanit, ai në të shkuarën është emëruar dhe shkarkuar disa herë, por gjithmonë ka qenë aty kur presidenca e thërriste për të marrë atë post deri në fund të sezonit. Ferronikeli mbeti pa trajner, pas largimit ditën e djeshme të Ismet Munishit.
I kontaktuar nga Tirana Today, Starova u shpreh se: “Sapo kam firmosur një kontratë një vit e gjysmë me ekipin e Ferronikelit. Jam shumë i nderuar për interesin që ata treguan menjëherë pasi morën vesh që unë isha liruar nga detyra e trajnerit tek Partizani dhe më bënë një ofertë e cila mu duk e arsyeshme dhe e pranova.”
Pse zgjodhët Kosovën dhe jo një ekip të kampionatit shqiptar, nuk donit të përballeshit me Partizanin?
“Nuk është se kisha mundësi zgjedhjeje në këtë rast, por ishte një ofertë nga ekipi kosovarë. Në Superiore është fundi i kampionatit dhe ekipet janë të plotësuara, nuk është se i druhesha Partizanit. Zgjodha ti bashkohem Ferronikelit dhe kam firmosur një kontratë, tani do ti përvishemi punës për të arritur objektivat. Kampionati është i hapur dhe ne do të japim maksimumin për të qenë në majë”, u shpreh Starova.
Një ofertë nga Superioria do t’iu tundonte në fundin e sezonit?
“Nuk mund të mendoj për këto gjëra në këtë moment, pasi sapo kam firmosur një kontratë dhe një eksperiencë e re fillon tani për mua. Jam i vendosur për të respektuar kontratën me presidentin e klubit të Ferronikelit, Naser Ramajn dhe kam një mundësi rinovimi kur kontrata të jetë drejt fundit. Të ardhmes asnjëherë nuk i dihet në futboll, por aktualisht jam duke menduar vetëm për ekipin dhe si të bëjmë më të mirën për të”, përfundon Starova për Tirana Today.
Tashmë për Starovën do të fillojë një eksperiencë të re, në një kampionat tjetër ku së fundmi kanë punuar shumë trajnerë shqiptar. Në Superligën e Kosovës Starova do të konkurrojë me Mirel Josën dhe Blendi Shkëmbin, dy njohje mjaft të vjetra për të. Ferronikeli aktualisht pozicionohet në vendin e 4, me 6 pikë më pak se kryesuesit e Dritës. TIRANA TODAY
