U fol gjatë në mediat serbe se presidenti i Federatës së Futbollit të Kosovës do të jetë në “Elbasan Arena” për të mbështetur ekipin e partizanit të Beogradit në përballjen me Skënderbeun. Pasi Fadil Vokrri ka qenë pjesë e ekipit të Partizanit në të kaluarën. Por këto pretendime janë hedhur poshtë me anë të një reagimi të faqes zyrtare të FFK-së, ku thuhet se Vokrri do të jetë në tribunën e stadiumit në Elbasan sepse ka një ftesë nga presidenti i Skënderbeut Ardjan Takaj dhe për asnjë arsye tjetër.
Ja dhe reagimi i plotë i FFK-së.
Presidenti i FFK-së, z. Fadil Vokrri është i ftuar si mysafir special nga presidenti i KF” Skënderbeu” i Korçës, z. Ardian Takaj në ndeshjen Skënderbeu i Korçës- Partizani i Beogradit, që zhvillohet të enjten në kuadër të Evropa Ligës. Për hir të së vërtetës, të gjitha spekulimet nga mediat serbe se gjoja presidenti Vokrri do të jetë në përkrahje të klubit beogradas janë vetëm fabrikime të kuzhinave tashmë të njohura serbe dhe nuk përkojnë me realitetin.
Presidenti Fadil Vokrri nga Tirana do të udhëtojë për në Londër ku më 23 tetor do të marrë pjesë në ceremoninë “The Best FIFA Football Awards 2017”.
