Referuar rastit të Kacifas, gazetari Artan Hoxha ka përcjellë të dhëna tronditëse mbrëmjen e djeshme, teksa ka qenë i ftuar në emisionin “Opinion”. Ai ka thënë se në varrimin e Kacifas ishin të njëjtët njerëz që sulmuan repartin, në ngjarjen e 10 prillit. Një komando greke prej tetë personash me uniforma të ushtrisë greke, hynë në territorin shqiptar, në afërsi të fshatit Peshkëpi pranë një reparti ushtarak. Komando vrau në befasi ushtarin Arsen Gjini, kapitenin Fatmir Shehu dhe plagosi tre shqiptarë. “Këto i keni për Vorio-Epirin”, kanë thirrur ndërsa gjuanin.
Gazeta “Elefterotipia” publikoi lajmin se vrasjet janë marrë përsipër nga grupi terrorist “Fronti për Çlirimin e Epirit”. Nën kërcënimin e armëve, maskat që flisnin greqisht duke përmendur Vorio-Epirin, i mbyllën 130 ushtarët në një dhomë, ndërsa dy oficerë të tjerë i izoluan në një zyrë tjetër.
Hoxha rrëfeu se tre pjesëtarë të forcave komando greke që shkaktuan masakrën e Peshkëpisë, morën pjesë në varrimin e Kostantinos Kacifas, në Bularat të Gjirokastrës. Po kështu ai konfirmoi se janë identifikuar tre komando, që ishin pjesëtarë të sulmit të repartit ushtarak, në prill të 1994.
