Palmat në qytetin e Durrësit janë pothuajse të gjitha të thara dhe pritet të zëvendësohen me palma të tjera. Temperaturat nën zero gjatë muajit janar, kanë dëmtuar në masë palmat e mbjella, gjatë viteve të fundit, në qytetin bregdetar të Durrësit. Pemët dekorative tropikale nuk arritën t’i mbijetonin të ftohtit të acartë.
Janë mbi 316 palma, të mbjella në rrugën e plazhit, në zonën që njihet me emrin “Pavarësia”, të thara dhe të cilat pritet të shkulen nga Ndërmarrja e Gjelbërimit.
Por e njëjta situatë është edhe në qytet, ku dhjetëra palma rezultojnë të thara. Të vetmet që i mbijetuan të ftohtit ishin pemët e mbjella në sheshin qendror të qytetit bregdetar, një pjesë e atyre në shëtitoren “Taulantia” dhe në bulevardin “Dyrrah”.
