Një sasi eksplozivi shpërtheu pranë banesës së Xhisiela Malokut. Nga kjo ngjarje nuk pati të lënduar, por as dëme materiale. Fill pas këtij rasti, ekspertët e Krimeve të Rënda në Policinë e Durrësit, nisën hetimet. Për hedhjen dritë të këtij akti, në pyetje është marrë Xhisiela. Për hetimorët mbetet disi e dyshimtë dëshmia e vajzës, bashkë me qetësinë që ajo ka deponuar.
Ky fakt ka bërë që hetimorët të dyshojnë për një inskenim të mundshëm të ngjarjes, duke mos përjashtuar as pista të tjera, shkruan sot gazeta “Panorama”.
25-vjeçarja, në intervistat e dhëna së fundmi i ka mëshuar fort faktit se tritoli është vendosur nga Partia Demokratike. Po kështu ajo ka përjashtuar si autorë familjarë të Rexhep Rrajës, ish-të dashurit të saj, djalit të deputetit të PS, Rrahman Rraja. Burime nga policia kanë bërë me dije se ende nuk kanë një të dyshuar për sulmin, ndonëse janë disa pista. Nuk përjashtohet fakti se Xhisiela të ketë marrë një mesazh nga të afër të ish-të dashurit.
“Deri tani, nuk kemi asnjë të dyshuar konkret për sulmin, por kemi disa pista dhe dyshimet tona. Nuk përjashtohet fakti se përmes këtij sulmi me lëndë plasëse, vajza të ketë marrë një mesazh nga të afërmit të ish-të dashurit. Nuk përjashtohen as pretendimet e saj, por as mundësia e një inskenimi të mundshëm”, bëjnë me dije burime nga policia.
