Përmbysja nga Kukësi ka qenë fatale për trajnerin e Kastriotit, Elvis Plori, i cili menjëherë pas ndeshjes vendosi të japë dorëheqjen. Lajmin e dha vetë tekniku në intervistën e dhënë për emisionin “Gol pas Goli”, në Supersport, ku vlerësoi angazhimin e skuadrës së tij, por dha arsyet që e çuan te dorëheqja.
Keni humbur një ndeshje, të cilën e interpretuat shumë mirë. Sa keqardhje ka në të tilla raste?
Më vjen shumë keq, pasi luajtëm mjaft mirë dhe mund të kishim shkuar edhe në avantazh të dy golave. Gjithsesi, përtej angazhimit, është mungesa e eksperiencës dhe vetëbesimit, ajo që ndoshta peshon dhe nuk na lejon të bëjmë rezultat. Nuk kam pishmane për lojën që bëri skuadra, por për fat të keq nuk ia dolëm të merrnim rezultat.
Si do të jetë e ardhmja e kësaj skuadre?
Unë personalisht kam vendosur ta mbyll sot me Kastriotin, pasi skuadra është në një moment, ku një ndryshim sado i vogël, do t’i bënte mirë. Më vjen keq për këtë vendim, madje dua të shtoj se nuk kam pasur asnjëherë vërejtje për angazhimin e futbollistëve, por është momenti që të ndryshojë diçka.
Çfarë mendoni se i ka munguar Kastriotit në këto javë, për të bërë më mirë?
Në fakt angazhimi dhe serioziteti në skuadër nuk na ka munguar asnjëherë dhe unë për këtë duhet të falënderoj të gjithë çunat dhe t’u uroj suksese. Mendoj se neve na ka munguar një lojtar goli, një futbollist që të shfrytëzojë rastet dhe të dërgojë topin në rrjetë. Lojtarë të tillë kushtojnë shumë dhe ne nuk kemi buxhete aq të larta. Për më tepër, kemi pasur edhe mungesë eksperience, pasi shumë lojtarë luanin për herë të parë në Superiore dhe nuk menaxhonin si duhet situatat e vështira.
