Në ndryshim nga PAA, Partia Aleanca Popullore ka zgjedhur të mos tërhiqet nga ankimi në Kolegjin Zgjodhor për listat e kandidatëve për deputetë.
Kreu i PAP, Artur Dojaka tha se një proces ligjor konsiderohet i tillë vetëm kur vendosin gjykatat, ndërsa shtoi se ata zgjedhin rrugën ligjore ndryshe nga aleati i tyre, PAA që zgjodhi rrugën politike.
“Ne do të vazhdojmë pranë Kolegjit Zgjedhor me ankimimin që nuk është asgjë tjetër përveçse ankimim në mbështetje të ligjit dhe shtetit ligjor. Nuk mund të lë pa përshëndetur marrëveshjen e mbrëmshme mes kreut të PS dhe atij të PD, gjë e cila i hap rrugë gjithë procesit. Por në fund të fundit ne pas 27 viteve tranzicion ne duhet të kuptojmë se procesi nuk është thjesht marrëveshje e disave në veçanti por është një poçes ligjor. Procesi ligjor mund të quhet i tillë vetëm në momentin që vendosin gjykatat dhe e tillë është dhe dita e sotme në Kolegjin Zgjedhor ku ne presim vendimin”, tha Dojaka për Ora News.
