Princi i Arabisë Saudite, Mohamed bin Salman u shpreh se mban përgjegjësi për vrasjen e gazetarit Jamal Khashoggi, pasi, sipas tij, e gjitha ndodhi para syve të tij. Kështu thuhet në një dokumentar të PBS që pritet të transmetohet më 1 tetor, përpara një vjetorit të vdekjes së Khashoggit.
Deri më tani ai nuk ka bërë asgjë publike lidhur me vrasjen brenda konsullatës Saudite në Stamboll, shkruan “Al Jazeera”. CIA dhe disa qeveri perëndimore pretendojnë që vrasja u krye me urdhër të tij. Mirëpo, nga ana tjetër, zyrtarët sauditë thonë se ai nuk kishte asnjë rol në këtë krim.
Ekzekutimi i Jamal Khashoggi shkaktoi reagime të shumta në mbarë botën, duke dëmtuar kështu imazhin e princit dhe ndikuar në ekonominë e eksportuesit më të madh në botë të naftës. Që atëherë, ai nuk ka vizituar as SHBA-të.
“Ndodhi para syve të mi. Unë kam marrë gjithë përgjegjësinë, sepse ndodhi para syve të mi”, tha ai për PBS, duke iu referuar një promoje të dokumentarit.
Në një raport prej 101 faqesh të publikuar në qershor nga Komisioneri i Lartë i OKB-së për të Drejtat e Njeriut, Arabia Saudite u akuzua si përgjegjëse për vrasje me dashje dhe paramendim të Jamal Khashoggit.
Po ashtu, në raport u theksua se ka prova të besueshme për hetimin e zyrtarëve të nivelit të lartë, përfshirë edhe princin e Arabisë Saudite, Muhammed bin Salman.
