Një arratisje si nëpër filma ka ndodhur mbrëmjen e djeshme në kryeqytet, ku dy të rinj i kanë bërë zbor policisë. Tentativat e dy të rinjve për tu larguar kanë qenë të kota, pasi blutë e Tiranës ia kanë dalë për ti kapur.
Dy të rinjtë e identifikuar si E. Kodra dhe G. Koci, që lëviznin me një “Tuareg”, nuk i janë përgjigjur thirrjes së patrullës së policisë pranë stacionit të policisë, ku i kanë bërë shenjë të ndalojë. Ata janë larguar me shpejtësi, nëpër rrugët e kryeqytetit.
Policia është vënë në ndjekje të tyre, dhe tek kryqëzimi i rrugës së Burgut ose “Jordan Misja”, dy të rinjtë janë përplasur me disa automjete e motorë. Ata kanë zbritur dhe kanë tentuar të arratisen më këmbë ndërmjet rrugës “Jordan Misja” dhe “Don Boskos”, por policia ka arritur t’i kapë. Pas një kontrolli të ushtruar ndaj tyre, ju janë gjetur dy pistoleta TT.
