Ambasadori i Bashkimit Evropian, Luigi Soreca, ka përshëndetur sekuestrimin e 5.2 mln euro pasuri në Lezhë. Llogaritë bankare me vlerë 5.2 milionë euro dhe 7 apartamente, u sekuestruan të enjten në Lezhë, në kuadër të operacionit “Forca e Ligjit”.
Në një postim në Twitter, Soreca shkruan:
“Sekuestrim i konsiderueshëm i të ardhurave të dyshuara kriminale sot në Lezhë nga Policia e Shtetit, në kuadër të operacionit “Forca e Ligjit” nga Ministria e Brendshme. Është e rëndësishme që sekuestrimet të pasohen nga vendime përfundimtare konfiskimi. “Ndiq paranë në luftën kundër krimit.”
Llogaritë bankare dhe apartamentet e sekuestruara janë në pronësi të Pjetër Vocit, 83-vjeç dhe vajzës së tij Shqipe Palaj, 50-vjeçe, dhe dyshohen se janë përfituar nga veprimtari kriminale.
Pas hetimeve të kryera me kërkesën e prokurorit Erjon Shehaj, Gjykata e Rrethit Gjyqësor Lezhë me vendimin nr. 17 date 23.01.2019, ka vendosur sekuestrimin e llogarive bankare, si dhe të 7 apartamenteve në Lezhë dhe Tiranë.
Sipas burimeve, paratë e sekuestruara ishin në llogarinë bankare të Shqipe Palajt, ndërsa janë depozituar në një bankë të nivelit të dytë nga Zvicra, vend ku jetojnë prej shumë vitesh vëllai dhe kunati i saj.
