Një efektiv policie i Forcës së Posaçme Operacionale është arrestuar nga Policia e Lezhës. Agjenti i policisë Jeton Lami 28 vjeç u ndalua pas hetimeve të kryera në kuadër të procedimit penal të vitit 2022, për veprën penale të rrëmbimit të personit, referuar nga strukturat hetimore të DVP Lezhë, pranë Prokurorisë së Rrethit Gjyqësor Kurbin.
Nga hetimet rezulton se polici i Operacionales ka “shpërdoruar detyrën”, duke përkrahur dhe transportuar një person shumë të kërkuar nga policia.
Jeton Lami, 28 vjeç nga Tirana, i është dhënë masa “arrest me burg” nga Gjykata e Kurbinit për veprën penale të “shpërdorimit të detyrës”, masë e caktuar më 23 gusht.
I arrestuari është punonjës policie, agjent pranë Drejtorisë së Forcës së Posaçme Operacionale në Policinë e Shtetit. Prokuroria e Kurbinit i ka nisur hetimet për rrëmbim personi, pas denoncimit të familjarëve të Ervis Martinaj se kanë humbur prej disa kohësh çdo kontakt me të.
Nga hetimet rezulton se 28-vjeçari duke qenë punonjës policie ka “shpërdoruar detyrën”, duke përkrahur dhe transportuar një person shumë të kërkuar. Më konkretisht, Jeton Lami përveçse ka mbajtur kontakte me të shumëkërkuarin, edhe është bërë shofer i tij duke e ndihmuar në arrati. Dëshmia e tij pritet të jetë kyçe për të zbuluar vendndodhjen e Ervis Martinajt. Ndër pistat e hetimit është ajo e rrëmbimit të personit nga grupet rivale kriminale.
