Të ndihesh më i ri nga ç’je në të vërtetë, është një shenjë e përgjithshme që flet për shëndetin e trurit tuaj. Ky është përfundimi i një studimi të ri, të publikuar tek revista Frontiers in Aging Neuroscience.
Jeanyung Chey nga Universiteti Kombëtar i Seulit, në Kore, realizoi së bashku me ekipin e saj një monitorim tek gati 70 njerëz, të moshës 59-84 vjeç, për të hulumtuar mbi lidhjen mes moshës subjektive dhe reale të trurit. Të gjithë pjesëmarrësit iu nënshtruan analizimit të skanerit MRI të trurit. Pas një sërë kërkimesh kryer në këtë drejtim, Chey u shpreh se njerëzit që ndiheshin më të rinj, kishin karakteristika strukturale të një truri më të ri.
“Kjo diferencë qëndron edhe nëse marrim parasysh faktorë të tillë si personaliteti, shëndeti subjektiv, simptomat e depresionit ose funksionet njohëse”, shton ajo.
Shkencëtarët mendojnë se njerëzit që ndihen të vjetër, janë më të frikësuar nga procesi i plakjes së trurit. Një tjetër shpjegim është se njerëzit të cilët ndihen të ri janë më të angazhuar me aktivitet fizik dhe mendor, dhe bëjnë një jetë më stimuluese, që përmirëson shëndetin mendor.
“Nëse dikush ndihet më i vjetër se mosha reale, mund të jetë shenjë që duhet të vlerësojë mënyrën e jetesës, zakonet dhe aktivitetet që mund të kontribuojnë në plakjen e trurit dhe të marrin masa për kujdesin e shëndetit mendor”, thotë Chey.
