Avokati Envi Hicka, njëherazi anëtar i Komitetit Ekzekutiv të FSHF-së, deklaroi në një studio televizive se ndeshja mes Shqipërisë dhe Serbisë po monitorohet me vëmendje të shtuar nga UEFA, për shkak të ngjarjeve të ndodhura njëmbëdhjetë vite më parë.
Sipas Hickës, UEFA ka vendosur të dërgojë dy oficerë sigurie për këtë përballje, ndryshe nga praktika e zakonshme ku zakonisht dërgohet vetëm një ose asnjë.
“Nuk e kam qejf rritjen e tensioneve apo emocioneve të tepërta. Preferoj një ndeshje të qetë, por nuk mund të mohoj që janë marrë masa të mëdha sigurie. Vetëm fakti që UEFA ka sjellë dy oficerë sigurie, tregon seriozitetin me të cilin trajtohet kjo ndeshje,” tha Hicka.
Ai shtoi se çështjet politike mbeten një pikë e ndjeshme për UEFA-n, ku edhe një pankartë apo një shprehje e vetme mund të sjellë dënime për ekipin pritës.
“Ka njerëz që duan të inskenojnë situata dhe përdorin pikërisht këto lloj ndeshjesh. Do të zhvillohet një mbledhje për sigurinë, ku do të diskutohen detajet më të vogla. Edhe Guardiola është dënuar për një shkrim në bluzë që u konsiderua politik. Prandaj, nuk duhet të ketë fare përzierje politike,” përfundoi Hicka.
