Vrasja e Kostandin Kaçifas duket se është një çështje mjaft e ndërlikuar. Së fundmi, telefoni celular i minoritarit grek nuk është gjetur ende. Ndërsa dyshohet se telefoni celular mund të japë detaje dhe të zbulojë informacione të rëndësishme, lidhur me dinamikën e ngjarjes.
Po ashtu, familja e 35-vjeçarit kërkoi që autopsia të bëhej nga një mjek ligjor grek, kërkesë kjo që nuk u pranua nga prokuroria e Gjirokastrës për shkak kompetencash, pasi çështja është në ndjekje nga Prokuroria e Krimeve të Rënda Tiranë.
Dje familjarët e Kaçifas depozituan kërkesën në Prokurorinë e Gjirokastrës, ndërsa kanë shprehur rezerva për të dhënat e palës shqiptare. Ata dyshojnë se ekstremisti u qëllua nga afër, duke mos u pajtuar me versionin e dhënë nga pala shqiptare.
Kaçifas mbeti i vrarë pasi pati shkëmbim zjarri me RENEA-n, duke mos pranuar të dorëzohet, pavarësisht thirrjeve nga kjo e fundit.
Kjo ngjarje ka shkaktuar reagime dhe kundër-reagime nga të dyja palët, ndërsa gjuha për vrasjen ka qenë e polarizuar si nga Tirana ashtu edhe nga Athina zyrtare.
