Vetëm pak kohë pasi Donald Trump kishte siguruar emërimin e Partisë Republikane si kandidati i tyre për President të SHBA-ve, djali i tij i madh Donald Trump Jr., është takuar me një avokate të lidhur me Kremlinin. Trump Jr., tha se kishte takuar duke shpresuar se do të merrte informacion të dobishëm për fushatën. Ai tha se i ati nuk kishte qenë në dijeni të këtij takimi. Kremlini reagoi sot, duke thënë se nuk ishte në dijeni të takimit dhe nuk e njihte avokaten në fjalë.
Donald Trump Jr. konfirmoi në një deklaratë se kishte rënë dakord për takimin në muajin qershor të vitit 2016 me avokaten ruse të lidhur me Kremlinin, pasi ishte njoftuar se ajo dispononte informacion që mund të dëmtonte kandidaten demokrate për presidente, Hillary Clinton.
Të pranishëm në takim ishin edhe Jared Kushner, dhëndrri i Presidentit Trump dhe tashmë këshilltar i lartë në Shtëpinë e Bardhë, si dhe Paul Manafort, në atë kohë drejtor i fushatës elektorale të zotit Trump.
I biri i Presidentit Trump tha se i ati nuk kishte qenë në dijeni të këtij takimi.
Gazeta “New York Times” njofton se kur ishte pyetur fillimisht për takimin me Natalia Veselnitskayan, Trump Jr. nuk e kishte përmendur informacionin politik që mund të përdorej kundër kandidates Clinton. Por, dje ai e ndryshoi deklaratën e tij duke konfirmuar se avokatja ruse do ta ofronte informacionin gjatë atij takimi, raporton VOA.
Trump Jr. i tha gazetës se u bë e qartë menjëherë gjatë takimit se zonja Veselnitskaya “nuk dispononte asnjë informacion të vlefshëm”.
Mediat amerikane njoftojnë se zonja Veselnitskaya njihet për përpjekjet e saj për lehtësimin e sanksioneve ndaj Rusisë, të vendosura pas abuzimeve me të drejtat e njeriut.
Prokurori i posaçëm Robert Mueller dhe disa komisione të Kongresit po zhvillojnë hetime paralele për të parë nëse pati bashkëveprim ndërmjet anëtarëve të ekipit elektoral Trump dhe Kremlinit, në veçanti rreth përpjekjeve të Rusisë për të ndërhyrë nëpërmjet hakerëve për të influencuar zgjedhjet presidenciale amerikane.
Presidenti Trump ka mohuar çdo lidhje me Rusinë dhe Moska ka deklaruar se nuk ka qenë autore e këtyre sulmeve kibernetike.
