Presidenti turk Recep Tayyip Erdogan, duke folur në mbledhjen e partisë së tij, ka paralajmëruar se operacioni ushtarak në Idlib është çështje kohe. Mjaft i vendosur në qëndrimin e tij, ai ka deklaruar se do ti japin fund agresionit në Idlib. Siç duket, Turqia i ka bërë tashmë planet, e këto janë paralajmërimet e fundit të Erdoganit. Referuar operacionit në Idlib, presidenti turk thotë se ndërhyrja e befasishme mund të ndodhë edhe natën.
“Jemi të vendosur ta kthejmë Idlibin në një vend të sigurt si për Turqinë, ashtu edhe për popullin e rajonin. Ne do t’i japim fund agresionit në Idlib. Këto do jenë ditët e fundit për tërheqjen e regjimit atje, dhe ne tani po bëjmë paralajmërimet tona të fundit.
Operacioni në Idlib tani është çështje kohe. Si në çdo operacion, ne themi se mund të vijmë papritmas edhe natën. Nuk ka rëndësi se çfarë kostoje do ketë që ta kthejmë Idlibin në një vend të sigurt për popujt e Turqisë dhe Sirisë”, ka përfunduar ai.
