Portieri i Izraelit, Ariel Harush ka qenë pengesa kryesore për shënimin e Kombëtares Shqiptare.
Ekipi kuq e zi u mund 2-0 mbrëmjen e djeshme. Edhe pse bënë një lojë shumë të mirë, djemtë tanë nuk mundën të shënojnë as edhe një herë.
Kjo për shkak të pritjeve të papara të portierit të Izraelit. Pas ndeshjes, Harush deklaroi se sfida e mbrëmshme ishte më e mira e karrierës së tij. Madje ai shtoi mund të priste edhe plumba.
“Kjo ishte ndeshja më e mirë e karrierës për mua. Një paraqitje si kjo e kam ëndërruar gjithmonë. Komplimente të gjithë shokëve të skuadrës që luftuan shumë. Po rrëqethem ende nga emocionet, nuk më kujtohet të kem përjetuar më parë një atmosferë të tillë në ekipin kombëtar.
Nuk ishte një ndeshje e madhe si ndaj Skocisë, por kishte sakrificë. Kjo skuadër ka talent, edhe pse askush nuk besonte se ne kishim shanse. Kjo ishte nga ato ndeshje kur unë ndjeja se as një plumb nuk mund të më kalonte dhe prisja ta ndaloja. Por nëse nuk plotësojmë detyrën në Skoci, asgjë nuk do të ketë vlerë.”– Ka thënë portieri që ndali kuqezinjtë.
