Unioni i Gazetarëve Shqiptarë ka reaguar ndaj ndalimit të publicistit Kastriot Myftaraj nga policia për shkak të thirrjeve për këtij të fundit për të vrarë ambasadoren e Bashkimit Evropian në Shqipëri, Romana Vlahutin.
Sipas njoftimit për shtyp, të UGSH-së theksohet se kjo është një masë ekstreme që është ndërmarrë ndaj Myftarajt. Ndërsa shpjegon se burgosjet për shkak të fjalës së lirë duhet t’i përkasin një kohe të shkuar.
“Unioni i Gazetareve Shqiptare e konsideron këtë një masë ekstreme dhe vlerëson se arrestimet apo burgosjet për shkak të fjalës dhe komentit të lirë në Shqipëri janë një histori e së shkuarës e cila nuk meriton në asnjë mënyrë të përsëritet. Liria e fjalës dhe e shprehjes duhet të bashkëjetojë me parimet dhe normat etike.
Komuniteti i mediave dhe sidomos ai i gazetarëve dhe editorëve shqiptarë le ta pranojnë këtë rast si një mundësi për distancim nga shkeljet dhe përdhosjet etike në komunikimet përmes mediave dhe atë publike.
Ne kërkojmë heqjen e prangave për publicistin dhe aplikimin e penaliteteve ligjore të cilat nuk parashikojnë vetëm burgimin për shkak të fjalës apo publikimit”, shkruhet në njoftimin për shtyp të UGSH-së.
