Ish-ministri i Bujqësisë, Haxhi Aliko është ndarë nga jeta në moshën 82-vjeçare. Lajmi është bërë i ditur nga miq dhe të afërm të politikanit, të cilët kanë ndarë lajmin e hidhur në Facebook.
Jeta e profesor Haxhi Alikos ishte e lidhur ngushtë me Fakultetin e Mjekësisë Veterinare, në të cilin u shkollua dhe zhvilloi një karrierë të shkëlqyer akademike 35-vjeçare, duke e filluar si asistent lektor dhe duke vijuar si titullar i lëndës “Fiziologjia e Kafshëve Bujqësore”, përgjegjës i Katedrës “Fiziologji-Biokimi” për 16 vjet dhe deri në Rektor i Universitetit Bujqësor të Tiranës për 4 vjet.
Haxhi Aliko ka qenë një personalitet i shquar i Shkencave Veterinare, me kontribute shumëvjeçare si drejtues katedre i Fakultetit të Mjekësisë Veterinare dhe Rektor i Universitetit Bujqësor të Tiranës.
Angazhimi i tij më pas në politikë si deputet dhe Ministër i Bujqësisë, i dha një dimension të ri dhe me peshë, profilit të personalitetit të tij të shquar.
Aliko u emërua Ministër i Bujqësisë në qeverinë e Bashkim Finos në vitin 1997.
