Ndahet nga jeta në moshën 85-vjeçare, e mbijetuara e fundit e Holokaustit e cila ka mbështetur faljen edhe për ata që kanë kryer krimet e Luftës së Dytë Botërore.
Eva Kor vdiq gjatë një vizite në Krakov të Polonisë, njoftoi djali i saj. 85-vjeçarja ka qenë hebreje e Rumanisë, e cila, në vitin 1941, është dërguar në kampin e përqendrimit Auschëitz, në Poloni, i cili drejtohej nga nazistët gjermanë.
Ajo u është nënshtruar eksperimenteve çnjerëzore mjekësore, nga të cilët vetëm ajo dhe motra e saj binjake kanë arritur t’ju mbijetojnë, ndërkohë që shumica e familjes së saj u vra nga nazistët.
Dy motrat u zhvendosën sërish në Rumani, për të jetuar me një të afërmen e tyre, në vitin 1945 pasi kampi u çlirua nga ushtria sovjetike. Më pas, në moshën 16-vjeçare ato të dyja janë nisur për në Izrael ku edhe kanë shërbyer në ushtri.
Kor, vite më vonë u zhvendos në Indiana të Shteteve të Bashkuara, ku ka jetuar më shumë se 30 vjet. Ajo ishte e martuar me po një të mbijetuar të holokaustit. Ndërkohë, motra e saj binjake, Miriam Zeiger, ka vdekur në vitin 1993 nga kanceri.
