Punonjësi i policisë së Burgjeve, Flamur Bejko, i akuzuar nga vëllezërit Beqiraj se i kishte paguar për të vrarë dy persona që e kishin rrahur, ka mohuar kategorikisht akuzat.
Nga hetimet ai rezulton se ka porositur vëllezërit Indrit dhe Gentian Beqiraj për të eliminuar dy shtetas me inicialet S.Z. dhe I.H. Ai u dha paraprakisht 3500 euro. Për këtë porosi, vëllezërit Beqiraj përgatitën kushtet për të eliminuar dy shënjestrat duke siguruar 4 kg tritol dhe 1 kallashnikov.
Porosia erdhi nga Flamur Bejko, pasi ishte rrahur nga S.Z. dhe I.H. Për motive të panjohura, krimi nuk u realizua. Pengmarrja e dështuar e Indrit Beqirajt angazhoi menjëherë strukturat e Policisë së Shtetit, në arrestimin e 14 personave, të cilët konsiderohen si bandë kriminale vrasësish me pagesë me bazë në Durrës.
Pasi dy vëllezërit rrëfyen në policinë e Durrësit shumë ngjarje kriminale në të cilat ishin përfshirë dhe kishin dijeni, u realizua megaoperacioni “Porositësi”, që vuri në pranga mjaft persona të rrezikshëm, ndërsa në kërkim janë 5 të tjerë.
