Javën e shkuar, katër dekanë prej 6 Universiteteve që ka Tirana, i bënë thirrje Ministres së Arsimit se kërkonin prej kohësh shakrkimin nga detyra të rektorit Mynyr Koni, me akuzat se prej 17 muajsh ai po e kryente detyrën e tij në kundërshtim të plotë me ligjin.
Kjo situatë solli një acarim të gjendjes mes dy palëve. Rektori Mynyr Koni në një intervistë të dhënë për gazetën “Panorama” ka thënë se mes tyre ka patur miqësi të hershme dhe se Dhori Kule ka qenë mbështetësi kryesor i tij në garën për Rektor të Universitetit.
Reagimi i plotë:
“Dhori Kule kërkon që ku të jetë ai, të jetë dhe pozicioni. I bie që sipas gjykimit të tij, rektori të jetë tashmë te Fakulteti Ekonomik. Dhori Kule më ka mbështetur në procesin zgjedhor, është një fakt që s’e mohoj kurrë, por tashmë duket e qartë arsyeja përse më paska mbështetur. Sa u përket numrave, unë kam fituar mbi 270 vota më tepër. Po ia fal ato 100 vota, përsëri shpallem fitues. Unë vlerësoj dhe respektoj në maksimum kolegët e mi, që më kanë votuar dhe do luftoj deri në fund për të mbrojtur stafin akademik dhe studentët e Universitetit të Tiranës. Ata gjithashtu kanë tentuar të pengojnë funksionimin e strukturës së auditit. Edhe Ministria e Financës ka marrë përsipër të interpretojë Ligjin e Arsimit sipas dëshirës së Dhori Kules. Kjo tregon suportin dhe lidhjet përkatëse të tij. Në fund të vitit 2016 është bërë një auditim mbi përdorimin e fondeve në shërbim të rrjetit të ekselencës, i cili është një NGO private dhe janë përdorur fonde nga universiteti në mbështetje të saj. Dalja nga ky auditim që u bë, shkaktoi reagim të bordit dhe Dhori Kule&Co, të cilët me veprimet e tyre krijuan pengesa për veprimtarinë e Rektoratit”- u shpreh qartë Mynyr Koni
