Në mbledhjen për zgjedhjen e kryetarit të ri të KMSH-së, Ylli Gurra, një prej tre kandidatëve në garë, ka deklaruar se nuk ka pasur kohën e mjaftueshme për shpalosjen e platformës së tij.
Ai ka kërkuar shtyrjen e zgjedhjeve, pasi sipas tij, çdo besimtar ka të drejtën të njihet me programin e secilit kandidat në garë, gjë e cila nuk ka ndodhur.
Sipas Gurrës, platforma e tij përfshin të gjitha idetë dhe mendimet e myftive të Shqipërisë, mbështetur në traditën më të mirë shqiptare.
Mes të tjerave, ai theksoi se nëse do të votohet, do i përkushtohet edhe një beteje pa kompromis ndaj të gjitha formave të ekstremizmit.
Në garë për kreun e Komitetit Mysliman Shqiptar, veç myftiut Ylli Gurra janë edhe kryetari aktual Skënder Bruçaj, që kërkon një mandat të dytë si dhe inspektori i xhamive i KMSH, Gëzim Abdishaku.
