Ish-ministri i Jashtëm i Shqipërisë, Besnik Mustafaj është shprehur lidhur me zhvillimet e fundit para fillimit të sezonit të ri Parlamentar.
Sipas tij, Partia Demokratike por edhe Lëvizja Socialiste për Intergrim që përbëjnë opozinën në vend kanë mungesë lidershipi.
“Duhet të kemi parasysh gjendjen e opozitës, është ajo që i ndez motorët. Opozita është në gjendje të dobët, jo thjesht numerikisht. PD është dobësuar, lidershipi i saj është ende i palegjitimuar, nuk rrezaton shpresë se do t’i përshtatet sfidave të reja, pavarësisht se si e mori drejtim. Nga ana tjetër kemi edhe LSI që kalon në opozitë pas një qeverisjeje disa vjeçare. Kjo më bën të mendoj se do jetë një kohë rehatie për qeverinë, sigurisht jo kohë normale”,- tha Mustafaj i ftuar te “News24″.
Më tej, ai tha se qeveria e re do kalojë një “kohë rehatie” pasi dhe njerëzit në vend kanë një distancim të dukshëm nga politika.
Po ashtu, Mustafaj u shpreh se Basha është një fake lider, dhe si i tillë nuk po tregon ende vizionin e duhur për të bashkuar demokratët.
