Isa Mustafa, kreu i LDK’së ka prezantuar kandidatin e partisë së tij për Kryetar të Prishtinës, Arban Abrashin. Ai ka thënë se drejtimi i Komunës së kryeqytetit do të ketë një fillim të vështirë, pasi do të përballet me mungesën e punës së Shpend Ahmetit për katër vite të qeverisjes së Prishtinës.
Sipas ish-kryetarit të Prishtinës, Ahmeti ka bërë vetëm zhurmë për projektet të cilat kanë filluar që në kohen kur LDK’ja kishte drejtimin e Prishtinës.
“Nuk është punuar gjatë këtyre katër viteve, është bërë shume zhurmë por nuk ka punë dhe projekte esenciale për Prishtinën. Është punuar vetëm në projekte që unë i pata kontraktuar më parë, siç kanë qenë ai i termokosit, ose i ujësjellësit. Nuk është ndërtuar asnjë shkollë, është ndërtuar shumë pak nga infrastruktura”, tha Mustafa.
Deputeti i LAA’së, Arban Abrashi tha se vet kandidimi i tij në Prishtinë garanton fitore dhe kthimin e kësaj komune nën qeverisjen e LDK’së. Ai premtoi t’ua ktheje Prishtinën qytetarëve dhe se do të merret me problemet e tyre.
“Qytetari i Prishtinës ka problem me ngrohje, me ndriçim, me ndotje akustike, me ndotje mjedisore, me parkingje, me transport. E unë si kryetar i ardhshëm do të merrem me këto. Nuk do të merrem me çështje regjionale, me çështje ndërkombëtare, nuk do të merrem me çështje të qeverisë”, u shpreh Abrashi.
Ai tregoi se ka zgjedhur ta shpallë zyrtarisht kandidaturën në parkun që ndodhet krejt pranë objektit të Komunës së Prishtinës, por që është lënë i shkatërruar.
“Konceptimi im politik dhe praktik për Prishtinën ka të bëjë që qytetari të jetë në fokusin tonë. Që të ndajmë hallet me ta, brengat me ta, dhe të gjejmë zgjidhje të përbashkët që tu ofrojmë qytetarit të Prishtinës”, tha Arban Abrashi.
