Isa Mustafa, në një postim relativisht të gjatë, në rrjetin social Facebook, ka akuzuar partnerin e tij në qeverisje PDK, duke u shprehur se po i shmanget përgjegjësive dhe premtimeve të cilat duhet të realizohen.
“Rrugëdalja nuk është të ikim nga përgjegjësia, të bëhemi rob i sondazheve, sepse kur i kemi hyrë kësaj pune jemi marrë vesh ta çojmë deri në fund, ndërsa sondazhet i bëjmë kur të përmbyllim punët dhe kur u vjen koha e zgjedhjeve të rregullta.”
Kryeministri i Kosovës gjithashtu shprehet i patrembur para sfidave me të cilat përballet vendi. Ai i bën thirrje Kuvendit dhe deputetëve që të mos dorëzohen para “kauzave të rrejshme”, siç i quan ai, referuar këtu Demarkacionit.
Nga ana tjetër Partia Demokratike e Kosovës jo vetëm që ka nisur fushatën, por ka publikuar edhe sondazhe që tregojnë rënien e LDK-së, gjë e cila ka ashpërsuar gjuhën e rivalëve. Zgjedhjet e parakohshme në këtë situatë mendohet se janë të pashmangshme, pas dështimit të koalicionit në reformat kyçe, siç janë Marrëveshja e Demarkacionit me Malin e Zi, e cila ishte arritur në gushtin e vitit 2015, por ende nuk është ratifikuar në Kuvend.
Analistët vendas ndërkohë kanë qasje të ndryshme. Ata hedhin dy ide qendrore. E para, që zgjedhjet gjithsesi kanë pak shanse të mbahen para pushimeve të verës dhe e dyta që përpos debatit në dukje, kjo mund të jetë një marrëveshje e fshehtë e dy partive në qeverisje, LDK dhe PDK për të ardhur sërish në pushtet dhe për të bërë thjesht shkëmbim të posteve.
