Presidenti Donald Trump po e shton presionin publik ndaj Kongresit për të miratuar propozimin e shumëdebatuar të një muri përgjatë kufirit SHBA – Meksikë, me qëllim ndalimin e emigracionit të paligjshëm. Megjithëse Presidenti kërcënoi edhe me mbylljen e operacioneve të qeverisë federale në fund të shtatorit, nuk janë të qarta shanset për realizimin e zotimit të tij elektoral për ngritjen e murit kufitar.
Presidenti Trump kërcënoi me mbylljen e qeverisë federale në fund të shtatorit kur mbaron buxheti i miratuar, nëse nuk jepet miratimi për ndërtimin e murit kufitar të premtuar prej tij gjatë fushatës presidenciale të vitit 2016.
“Për sa i përket çështjes së kufirit… nëse nuk përfitojmë siguri kufitare pas kaq shumë vite fjalësh në Shtetet e Bashkuara, atëherë nuk do ta kisha problem të mbyllej qeveria. Ka ardhur koha të kemi sigurinë e duhur të kufirit”, deklaroi Presidenti Trump.
Presidenti Trump shtoi se ai do të lërë gjithnjë hapësira për negocime. Nuk janë të qarta shanset e përmbushjes së objektivit të Presidentit për financimin në fund të shtatorit të murit kufitar.
