Jose Mourinho është tallur me trajnerin holandez, Frank de Boer, për të cilin tha se është trajneri më i dobët në botë dhe në histori të Premierligës.
Trajneri i Manchester Unitedit, nuk i ka pranuar kritikat e de Boer, i cili kishte folur nw lidhje me anglezin Marcus Rashford. “Është për të ardhur keq që menaxher i tij është Mourinho, sepse ai është një lojtar anglez dhe duhet që atij t’i jepet kohë”, tha ish-shefi i Crystal Palace dhe Ajax për BT Sport.
De Boer shtoi: “Ai mund të bëjë gabime, por Mourinho nuk është i tillë dhe nëse ai ka një ose dy lojëra të mira atëherë atë e nxjerr jashtë. Ai është shumë i ri dhe ka nevojë të luajë, por ai është aq i talentuar dhe ju doni ta shihni atë të luajë çdo javë.” Portugezi tha se De Boer është trajneri më i dobët në botë dhe në histori të Premierligës.
“Kam lexuar se çfarë ka thënë trajneri më i dobët në botë dhe në histori të Premierligës. De Boer ka thënë se Rashford nuk është mirë që ka një trajner si unë. Por, nëse Marcus do të kishte një trajner si ai, ai do të mësonte si të humbiste, sepse ka humbur të shtatë ndeshjet në Angli dhe nuk ka shënuar asnjë gol”, tha Mourinho gjatë konferencës për media, para ndeshjes me Sevillan.
