Motra e Haklajve, Zylfije Haklaj, ka hedhur në gjyq ish-kryeministrin Berisha. Ajo ka paditur Berishën, pas akuzave të tij në një emision televiziv, në adresë të Haklajve dhe gazetarit, Artan Hoxha.
Zylfije Haklaj kërkon dënimin Berishës për shpifje. Tashmë ajo e ka ftuar të provojë para Gjykatës së Tiranës akuzën e tij, sipas të cilës, gazetari Artan Hoxha ka qenë pjesë e bandës së Haklajve.
Zylfije Haklaj, motra e Shkëlqim, Halil, Ylli dhe Fatmir Haklajt të vrarë në Tropojë, ka vendosur të padisë penalisht Berishën, pas akuzave të tij në një emision televiziv.
Ajo i kërkon gjykatës dënimin e ish-kryeministrit për kryerjen e veprës penale të parashikuar në nenin 120 të Kodit Penal. Kjo me pretendimin se ka cënuar nderin, dinjitetin dhe reputacionin e familjes së Haklajve, raporton “shqiptarja.com”.
Në kërkesën drejtuar gjykatës, Zylfije Haklaj hedh poshtë akuzat e Berishës se ka pasur ndonjë bandë të Haklajve dhe se Artan Hoxha ka qenë pjesë e saj. Ajo thotë gjithashtu se familja Haklaj nuk ka paguar asnjë gazetar, për t’u bërë zëdhënës i saj.
