Rrjeti elektrik i shpërndarjes ka pësuar defekte të shumta, si pasojë e motit të keq me reshje bore dhe erë të fortë. Për pasojë, banorët në zona të ndryshme të Shqipërisë, po vuajnë mungesën e energjisë elektrike.
Sipas OSHEE, zona më e prekur nga moti i keq ka qenë ajo e Korçës, ku janë konstatuar përcjellës të këputur të linjës 35 kV, thyerje izolatorësh, dëmtime kabllosh, etj.
“Si pasojë e terrenit malor, brigadat e punonjësve të OSHEE e kanë pasur të pamundur të ndërhyjnë në zonat e thella. Me ndalimin e reshjeve dhe pastrimin e rrugëve nga borëpastrueset, ka rinisur sot herët puna në terren”, thuhet në njoftimin e OSHEE-së.
Në informacionin më të fundit të shpërndarë për mediat, rreth orës 10:00, thuhet se është normalizuar situata e furnizimit me energji në zonën e Dardhës, Voskopojës, Fushë-Maliq, Podgorie, Sheqeras, Bitinckë, Komuna Qendër.
Gjithashtu energji ka marrë dogana Kapshticë si dhe është vendosur në punë linja 35 kV Maliq-Lozhan që kishte përcjellës 35 kV të këputur. Është normalizuar furnizimi me energji i nënstacionit Lozhan, dhe kanë marrë energji komuna Moglicë dhe Hecet (Strelca, Verba).
Aktualisht janë pa energji elektrike disa fshatra. Më konkretisht: Stravaj, Mjeshovë, Cakran, Kumë, Lekbibaj, Fajza, Kacinar, Luf, Vithkuq, Trebinjë, Miras, Progër, Velçan, Lozhan, Voskop, Liqenas, Hocisht, Ploçisht, Drenovë.
