Kryeministri Rama dhe ministrat e tij, kanë prezantuar “Paktin për Universitetin”. Përveç ministrave të përfshirë në grupin e punës, janë edhe rektorë, dekanë, pedagogë madje dhe studentë.
Prezantimin e “Paktit për Universitetin”, qeveria ka zgjedhur ta bëjë përpara grupeve të interesit, përmes një takimi të mbajtur këtë të premte në Kryeministri. Në fjalën e tij, Rama kërkoi që kjo ‘shfaqje’ të mbarojë sa më parë.
“Studentët e bënë punën e tyre, ngritën kërkesat, ne i dëgjuam. Unë nuk e di sa kanë dëgjuar universitetet nga kjo. Por kjo shfaqje me shumë fytyra duhet të mbarojë sa më parë. Të jemi gati të bëjmë aq sa mundemi, ndoshta edhe më tepër. Por nuk mund të marrim përsipër të bëjmë detyrat që ligji ia ngarkon universitetit. Mos prisni që unë të bëhem me studentët, dhe të vij te ju”, tha ndër të tjera Rama, duke iu referuar pedagogëve që i akuzoi se nuk bëjnë mësim.
