Gentian Hoxha, pronari i servisit të celularëve që u plagos pak ditë më parë është lënë në burg nga Gjykata e Tiranës. Policia vendosi arrestimin e Hoxhës kur ai ishte në spital, pasi mbeti i dëmtuar nga shpërthimi i një mine.
Hoxha akuzohet për ‘Prodhim dhe mbajtje të armëve dhe municioneve luftarake’, ndërsa në spitalin e Traumës mbërritën paraditen e sotme prokurori Ervin Karanxha dhe gjyqtarja Shefkie Demiraj, të cilët i kanë komunikuar masën e sigurisë Hoxhës.
Por, çfarë rrëfeu vetë Gentian Hoxha lidhur me ngjarjen e rëndë? Mësohet se 34-vjeçari i ka mohuar akuzat se monton mina me celularë, ndërsa ka treguar versionin e tij të ngjarjes.
“Më erdhi një pako dhe shpërtheu”, mësohet të ketë thënë ai, raporton “Panorama”.
Në tavolinën e punës së tij u sekuestruan 3 detonatorë dhe 2 kapsolla të pashpërthyera. Ekspertët morën edhe monstra nga pluhuri i tritolit, ndërsa të gjitha materialet mësohet se shërbenin për të montuar mina me telekomandë.
Ndërkaq, nga burimet policore mësohet se po verifikohen disa persona që mendohet se kanë lidhje me Hoxhën, ndërsa kjo linjë e bombave me celular ofronte materialin kundrejt një çmimi prej 1500 eurosh.
