Abuzimet seksuale me të mitura, mbeten një kambanë alarmi. Rasti më i fundit është zbuluar nga policia në Mirditë.
Sot vendi u trondit nga një ngjarje monstruoze. Pesë persona janë arrestuar, pasi dyshohet se kanë abuzuar seksualisht me një 15-vjeçare, të cilës gjithashtu i kanë bërë presione dhe shantazhe për të mos treguar. Në media janë publikuar emrat e pesë të arrestuarve, për përdhunimin e 15-vjeçares në Mirditë. Për ngjarjen e rëndë, në pranga janë vënë shtetasit Artan Kaçorri, Albert Molla, Ermal Tarazhi, Nikë Lleshi dhe një 17-vjeçar me iniciale A.Gj.
Dyshohet se në bashkëpunim me njëri-tjetrin, ata e kanë detyruar të miturën me anë të shantazheve, që të kryejë marrëdhënie seksuale me ta. Ata kanë përdorur taktikën e shantazhit, për të abuzuar me 15-vjeçaren, identiteti i së cilës nuk bëhet me dije.
Rastet e abuzimeve seksuale janë kthyer në një fenomen shqetësues për shoqërinë shqiptare. Fenomeni i abuzimit me të mitura, për fat të keq është gjithmonë e më në rritje. Ngjarje të tilla tepër të rënda kanë ardhur në rritje, ku shpeshherë dhuna dhe abuzimet seksuale lënë pasoja fizike dhe psikologjike tek të abuzuarat. /Tirana Today
