Lëvizja Socialiste për Integrim ka ankimuar në Gjykatën e Beratit vendimin e Prokurorisë së Përgjithshme për mosfillimin e procedimit penal ndaj kryeministrit të Shqipërisë, Edi Rama. Baza ligjore: Neni 75/a e vijues dhe neni 291 i Kodit të Procedurës Penale. Seanca do të mbahet më 16 maj në orën 11:00.
Më herët në janarin e këtij viti, Monika Kryemadhi bëri të ditur padinë e ngritur ndaj kryeministrit Rama mbi zgjedhjet e vitit të kaluar, ku sipas Kryemadhit Rama i bëri thirrje policisë së shtetit për t’u përfshirë në proces zgjedhor me qëllim rrëmbimin e votave ndaj LSI, për PS.
“Sa të duash ka prova por një nga këto ne kemi një akt padi që kemi dorëzuar në prokurori, për sa i përket zgjedhjeve të 2017, ku në mënyrë flagrante hapur publike z.Rama i bëri thirrje policisë së shtetit për të përfshirë në proces zgjedhor, në rrëmbimin e votave ndaj LSI, për PS në këmbim të vendit të punës apo të kapelës së policit dhe deri më sot nuk është bërë absolutisht asgjë me dijenitë tona, megjithatë ne do ta ridërgojmë edhe njëherë akt padinë tonë kundër kryeministrit të Rilindjes për shkelje të Kushtetutës. Dhe shkelja e Kushtetutës dhe shpërdorimi i detyrës është një nga aktet më të rënda”, tha Kryemadhin në bashkëbisedimin e 8 janarit me gazetarët.
