Floyd Mayweather, ish-boksieri amerikan që ka vendosur një rekord absolut në këtë sport duke zhvilluar plot 50 duele dhe i ka regjistruar të gjitha fitore. Ai është përfshirë në një incident me armë në qytetin e Atlantës, ku autokolona e tij është sulmuar nga një person dhe ka mbetur i plagosur një nga truprojat e tij.
Gregory La Rosa, u qëllua me një plumb në këmbë, por në njoftimin e policisë raportohet se nuk ka qenë lëndim serioz dhe ka dalë nga spitali vetëm pas tre orësh. Ylli amerikan i boksit besohet se nuk ndodheshe në automjetin që u sulmua dhe ka shpëtuar pa u dëmtuar.
Policia e Atlantës tha se incidenti nuk duket të ketë qenë rastësi, por mjeti i La Rosës ka qenë në shënjestër, edhe pse nuk dihet me saktësi arsyeja. Sipas të dhënave paraprake, agresori kishte pasur informacione mbi kalimin e autokolonës dhe se cilët ishin pjesë e saj.
Mësohet se gjatë natës grupi i Mayweather ka qenë në një klub nate dhe më pas në një restorant por nuk dihet nëse ka pasur ndonjë përplasje me ndonjë grup tjetër. Zëdhënësi i policisë, Donald Hannah është shprehur se personi që organizoi sulmin ka qenë i informuar mbi lëvizjet që do të bënte autokolona dhe nuk i ka pritur në një pikë të caktuar.
Mayweather, tashmë 41-vjeçar, është tërhequr nga boksi. Në gusht të vitit 2017, ai mposhti për herë të fundit sportistin e arteve marciale të përziera, Conor McGregor, duke e zgjeruar rekordin perfekt në karrierën e tij në 50 ndeshje pa u mposhtur. Dueli mes Mayweatherit dhe McGregorit gjeneroi mbi 450 milionë paund të ardhura, duke e bërë atë një nga më të pasurit e historisë së boksit.
