Juventusi ishte mjaft aktiv në merkaton e verës dhe është përforcuar ndjeshëm me lojtarë me eksperiencë të madhe, pasi objektivi kryesor është që të triufojnë në Champions League. Ish-drejtori i Juventusit, Luciano Moggi pavarësisht se është pezulluar përjetësisht nga Federata Italiane e Futbollit vazhdon të qëndrojë shumë pranë tij dhe të japë këshilla.
Në një intervistë për mediat italiane, Moggi është shprehur i pakënaqur me lëvizjet që kanë bërë bardhezinjtë këtë verë. Ai nuk e pëlqen transferimin e Ronaldos dhe rikthimin e Bonuccit, po ashtu i ka befasuar të gjithë kur është shprehur se sheh Interin këtë sezon kampion të Italisë.
“Mbeten shumë pranë Juventusit dhe shpesh bisedoj me Andrea Agnelli. Është një djalë i zgjuar. Ka qëndruar pranë nesh 12 vjet dhe i ka mësuar të gjitha. Ai e di mirë se Juventus ka fituar 36 tituj, të gjithë në fushën e lojës. Askush nuk e ka ndihmuar ndonjëherë të fitojë padrejtësisht.”
I pyetur nëse kishte qenë ai që ia kishte sugjeruar blerjen e Cristiano Ronaldo, Moggi u përgjigj: “Jo, ka vendosur FIAT. Unë nuk do ta kisha marrë sot. Kur ishte 18 vjeç më pëlqente. Fola me Sportingun e Lisbonës dhe i propozova një shkëmbim me Salas, të cilit do t’i jepnim edhe 5 milionë euro dëmshpërblim. Por Salas shkoi te River Plate, ndërsa Ronaldo zgjodhi Manchester United. Ishte koha kur te Juventus nuk kishin para për të investuar.”
“Do ta kisha shitur më parë Higuain për 50 milionë euro dhe e përsëris që nuk do të kisha marrë Ronaldo tani që është 33 vjeç. Në Spanjë më kanë thënë se ai nuk gëzon kur shënon një shok ekipi dhe Perez më tha se donte të largohej sepse ai nuk kishte pranuar që Real Madrid ta bënte Real Ronaldo.”
Në fund, “Big Luciano” shtoi: “Bonucci? Shkëmbimi me Caldara ishte një gomarllëk i madh… Titullin? Unë mendoj se e fiton Inter, bujshëm!”
“Futbolli mbetet jeta ime, edhe pse futbolli i sotëm ma shpif. Edhe nëse do të doja nuk do të mund të qëndroja jashtë. Vazhdojnë të më telefonojnë dhe të më kërkojnë këshilla,” – tha Moggi, i cili në sezonin e kaluar ishte drejtori i Partizanit në Shqipëri.
“Titullin e fiton Interi. E njoh pak Spaletin, më duket si prift kur flet, por kanë bërë një skuadër të madhe. Kanë marrë një qendërmbrojtës të fortë, Naingolan në mesfushë që kontrollon lëvizjet dhe një kampion përpara, Lautaro Martinez. Roma ka shitur siguri dhe ka blerë shpresa. Problemi është se atje krijojnë heronj për 10 minuta, shih Klajvert. Napoli është një skuadër për vendet e para, por nuk shoh se si mund të fitojë titullin”, u shpreh Moggi.
Duke u ndalur te Napoli, aty është tashëm trajner një emër i madh si Carlo Ancelotti, për të cilin ish-drejtuesi i Juventusit ka treguar disa prapaskena për vitet si bardhezi.
“Trajner i madh, as nuk diskutohet, përveçse një njeri i shkëlqyer, por mund të mos mjaftojë. Te Juventusi nuk kishte eksperiencën e duhur e gjithsesi bëri dy kampionate të mira me ne. Tifozët nuk e donin, se vinte nga Parma. Unë fola me tifozët dhe u thashë: ‘Ancelott është një derr? Atëherë ta dini që për herë ë parë një derr do të ulet në pankinë pasi Ancelott do të jetë trajneri i Juventusit’”, tregoi Moggi për atë takim me tifozerinë.