Mjeku spanjoll, Pedro Luis Ripoll, është i shqetësuar për gjendjen shëndetësore të yllit të Barcelonës, Lionel Messit, dhe beson se argjentinasi nuk duhet të luajë nga minuta e parë në ndeshjen kundër Real Madridit.
Barcelona do të ndeshet me Real Madridin në Camp Nou, të mërkurën, për gjysmëfinalen e parë të Kupës së Mbretit. Trajneri Ernesto Valverde duket se do të duhet të organizojë formacionin pa yllin argjentinas.
Në minutën e 70-të të ndeshjes kundër Valencias, të shtunën, pasi shënoi golin e barazimit, Messi bëri që të mbizotërojë heshtja në Camp Nou, por pas një përplasje me Antonio Laton ai mbeti i lënduar.
Megjithatë, pas një trajtimi nga mjekët e klubit, argjentinasi u kthye në fushën e lojës, gjë që u duartrokit nga tifozët e pranishëm në stadium. Por, Messi nuk luajti me të njëjtin intensitet në pjesën e mbetur të lojës dhe nuk e bëri asnjë vrapim të shpejtë.
“Ai pësoi një lëndim në pjesën e brendshme të muskulit të këmbës së tij të djathtë. Si rezultat i kësaj, fijet muskulore u lënduan dhe sipas të gjitha gjasave, ai pati një gjakderdhje”, ka thënë Piroll.
“Messi driblon shumë shpesh dhe për ta bërë këtë gjë në mënyrë efektive, ai ka nevojë që muskujt e tij të jenë në gjendje të mirë. Natyra e lëndimit të tij kërkon përkujdesje të veçantë për t’i shmangur komplikimet e mëtejshme. Ai nuk duhet të luajë nga fillimi”.
Sot pritet të bëhet e ditur nëse Messi do të jetë në gjendje të luajë nesër kundër Real Madrid. Argjentinasi e kishte humbur El Clasicon e parë të këtij sezoni, në kuadër të La Ligës pasi ede atëerë ishte i dëmtuar.
