Kreu i grupit parlamentar të LSI-së, Petrit Vasili ka folur me tone të forta kundër buxhetit, i cili u miratua në orët e para të mëngjesit, pas një seance maratonë.
Gjatë një bashkëbisedimi me gazetarët, Vasili tha se miratimi i buxhetit shënoi fundin e shpresës së çdo shqiptari, ndërsa akuzoi se qeveria po i shpërndan paratë tek pasanikët e mëdhenj klientë.
“Dje u shënua armiqësia mes qeverisë dhe pasanikëve të mëdhenj klientë të saj dhe familjes shqiptare, e cila mori shuplakë shumë të rëndë shoqëruar me depresionin e madh të mungesës së shpresës.
Kjo shënon edhe fundin e qeverisjes për një arsye shumë të thjeshtë, kur të paraqitet buxheti i radhës i 2019, qeveria nuk do arrijë ta paraqesë, nuk ka nevojë për kryeministër, secili mund të pajtonte financier të zotin, pasi do shpërndante paratë e koncesioneve. Qeveria ka humbur dje mundësitë politikë për prioritetet, strategjitë, rrugën ku do eci vendi. Nuk ka më para, po i shpërndan ato te secili prej pasanikëve të mëdhenj klientë, dhe kjo e kthen qeverinë në institucion që i lan borxhet pasanikëve dhe i heq të drejtën familjeve për të vazhduar jetën.
Është dërdëllitur për mjekësinë falas. Sot nuk kemi shëndetësi falas. Ky buxhet ishte një tezë e mashtrimit popullor. Kaluan 4 vjet pa bërë asnjë vepër të re shëndetësore, asnjë revolucion ën teknologji, asnjë spital i ri sepse nuk ka para për të ndërtuar spitale. Unë them që ka para, pasi milionat që shpërndajnë për koncesione, mjaftojnë për të ndërtuar spitale të reja cdo vit.
Familja shqiptare ka marrë një shuplakë të madhe të radhës, e shoqëruar me depresion sepse nuk ka asnjë shpresë. Ka marrë përfundimisht shpresën dhe iluzionet për këdo!”, tha ndër të tjera Vasili.
