Ministria për Evropën dhe Punët e Jashtme e Shqipërisë ka dënuar ashpër lëshimin e një rakete balistike me rreze të mesme, të kryer sot nga Koreja e Veriut.
Në një njoftim të shpërndarë medieve, kjo ministri shkruan se lëshimi i raketës është në shkelje e hapur e të drejtës ndërkombëtare dhe e rezolutave të Këshillit të Sigurimit të OKB-së.
“Qeveria shqiptare i bën thirrje RDPK të ndalojë menjëherë provokimet dhe të kthehet në tryezën e bisedimeve si rruga e vetme për një zgjidhje paqësore dhe të qëndrueshme në gadishullin Korean”, shkruhet ndër të tjera në njoftim.
NJOFTIMI I PLOTË I MEPJ:
“Ministria për Evropën dhe Punët e Jashtme e Republikës së Shqipërisë dënon në termat më të ashpër lëshimin e një rakete balistike me rreze të mesme të kryer sot nga Republika Popullore Demokratike e Koresë.
Kjo shkelje e hapur, e përsëritur, e të drejtës ndërkombëtare dhe e rezolutave të Këshillit të Sigurimit të OKB-së tregon se regjimi koreanoverior është i vendosur të vazhdojë të sfidojë komunitetin ndërkombëtar duke përshkallëzuar më tej tensionin në rajon dhe kërcënuar në mënyrë serioze sigurinë globale.
Qeveria shqiptare i bën thirrje RDPK të ndalojë menjëherë provokimet dhe të kthehet në tryezën e bisedimeve si rruga e vetme për një zgjidhje paqësore dhe të qëndrueshme në gadishullin Korean”.
