Në Shqipëri janë zbuluar tre vatra të gripit të shpendëve, në Fushë-Krujë, Dajt dhe Bujan. Ministria e Bujqësisë ka urdhëruar ndalimin e tregtisë së shpendëve të gjallë në mjediset e hapura dhe tregjet e kafshëve të gjalla në Shqipëri. Megjithatë vlen të theksohet se gripi i shpendëve H5N8, i konfirmuar tashmë edhe në Shqipëri, ka rrezik të ulët për shëndetin publik.
“Tregjet e gjësë së gjallë përbëjnë një rrezik, sepse ne ju themi fermerëve që edhe në zonat e kuqe, por edhe në zonën e mbikëqyrur që kafshët t’i mbajnë brenda kotecit ose të rrethuara me gardh në mënyrë që t’i ushqejnë vetë. E njëjta gjë ndodh edhe me tregjet e gjësë së gjallë, duke vajtur tufa të cilat mund të jenë të infektuara, infektojnë edhe kafshët e tjera edhe në zonat që ne i kemi të pastra”, u shpreh Ermira Gjeci, zv.ministre e Bujqësisë.
Zv.Ministrja e Bujqësisë thotë se Shqipëria ka ndaluar importin e shpendëve me mbi 14 shtete, duke përfshirë edhe vendet fqinje si Italia, Greqia dhe Kosova.
“Shqipëria pavarësisht numrit të madh të vëndeve që janë përfshirë në urdhrin e fundit të ministrisë, nuk ka marrëdhënie tregtie me pjesën dërmuese të këtyre vendeve. Kryesisht marrëdhënia tregtare janë të lidhura me vendet fqinje. Risku i transmetimit të këtij virusi tek njerëzit është shumë i ulët”, thotë zv/ministrja Gjeci.
“Të gjitha produktet me origjinë shtazore, përfshirë këtu dhe ato që vijnë nga shpendët duhet të gatuhen në temperaturë mbi 70 gradë celcius, në mënyrë që të shmangim cdo rrezik të mundshëm. Nuk ka asnjë lloj problematike për transmetimin e saj me anë të ushqimit”.
