Shpëton për mrekulli ministri serb, Ivica Daçiç, gjatë një takimi në Somali, ku ka ndodhur një shpërthim me eksplozivë duke shkaktuar 9 viktima dhe 13 të plagosur.
Mes viktimave është edhe ish-ministri i Jashtëm i Somalisë, Hussein Elaba Fahia, i cili mbante postin e këshilltarit të presidentit. Ekstremistët somalezë e aktivizuan bombën në makinë gjatë momentit që po kalonte ish-ministri, i cili mendohet të ketë qenë objekt i atentatit.
Pikërisht kur shpërthimi ka ndodhur, në Presidencën somaleze ndodhej ministri i Jashtëm serb, Ivica Daçiç në një takim së bashku me delegacionin serb. Megjithatë, tersi duket se nuk i është ndarë ministrit serb, teksa edhe gjatë largimit nga Somalia, ka qenë pjesë e një tjetër incidenti.
Kjo pasi avioni me të cilin ai po udhëtonte për në Athinë pati probleme.
“Avioni që ne udhëtonim pati një ulje urgjente për shkak të mos-funksionimit që është eliminuar dhe aktualisht po presim që të vazhdojmë udhëtimin për në Beograd”, u shpreh Daçiç për mediat serbe.
Sipas gazetës Blic, Daçiç shkoi me delegacionin në takim 10-15 minuta para se të ndodhte shpërthimi.
