Sasia e kokainës e kapur në Maminas i përkiste organizatës kriminale kolumbiane “Clan del Colfo”. Kjo është deklarata e ministrit të Mbrojtjes së Kolumbisë, Luis Carlos Villegas, i cili ka folur gjatë një vizite në bazën e Forcave Speciale të Policisë Kombëtare, ku i ka kushtuar rëndësi edhe operacionit të finalizuar në Shqipëri, ku u kapën 613 kg kokainë e ardhur nga Kolumbia.
Ai theksoi se forcat e sigurisë kolumbian vazhdojnë të përballen me forcë për fenomenet e ndryshme të krimit, veçanërisht grupeve të organizuara të armatosura si ELN, grupet e mbetura të FARC-ut dhe “Clan del Golfo”.
“Ushtria Kombëtare e Kolumbisë kishte raportuar për një operacion të përbashkët me agjencitë ndërkombëtare për kapjen e 613 kilogramë kokainë nga bandës kriminale “Gulf klan” te cilat u konfiskuan në portin e Durrësit, ne Shqipëri, më 2 mars. Droga e sekuestruar ishte fshehur në dyshemenë e një kamioni qe e la Kolumbinë në mes të janarit, i ngarkuar me banane, me një anije që do të ndalonte ne disa porte në Europë para se të arrinte në portin e Durrësit, ku edhe u shkarkua. Droga u kap në sajë të informacionit në kohë të dhënë nga agjencitë pjesëmarrëse, e cila mundësoi planin e policisë shqiptare, një operacion për të kontrolluar rrugën e kontejnerit, në pronësi të një kompanie shqiptare që nga koha e ardhjes së saj në portin e Durrësit, vendi ku policia ndërhyri në kontejnerin dhe gjeti drogën”.
Sipas ministrit kolumbian, “Clan del Golfo ka kontakte në disa porte të Europës ku dërgon ngarkesa droge. Ai tha se kjo organizatë ka humbur nga 2014 rreth 6 miliardë dollarë.
Ndërkohë, kryeministri Rama ka theksuar disa herë se ky ishte një operacion totalisht i forcave ligjzbatuese shqiptare, duke kundërshtuar edhe deklaratën e parë të ministrit Xhafaj, pas operacionit të madh.
Aktualisht, në lidhje me ngjarjen janë arrestuar dy persona, konkretisht shoferi i kamionit dhe një punonjës i kompanisë, ndërsa pronari i “Arbri Garden” është shpallur në kërkim.
Ky i fundit deklaroi në një televizion se do të dorëzohej në polici shumë shpejt dhe se ishte i pastër.
