“Mund të ketë terren të ri për negociata” midis Ukrainës dhe Rusisë për ndalimin e luftimeve dhe sigurimin e korridoreve të sigurta për eksportet e grurit, sipas Ministrit të Jashtëm turk, Mevlut Cavusoglu.
Turqia beson se lufta duhet të përfundojë përmes një procesi diplomatik “sa më shpejt të jetë e mundur” për “hir të të gjithë rajonit dhe të gjithë njerëzimit”, tha Cavusoglu, duke folur në një konferencë të përbashkët shtypi në Ankara me homologun e tij rus, Sergej Lavrov.
“Turqia është e gatshme të marrë një rol lehtësues”, tha Cavusoglu.
“Ndalimi i eksportit të drithit është një nga pasojat negative të luftës, dhe duhet të vendoset një plan për rifillimin e eksporteve”, shtoi ai.
“Ka shumë ide” se si të krijohet një korridor i hapur për eksportet e grurit nga Ukraina, tha Cavusoglu, i cili shtoi se një plan i OKB-së ishte “i arsyeshëm dhe mund të zbatohet”, por kërkon më shumë bisedime.
Duke folur gjithashtu në konferencën e përbashkët për shtyp, Lavrov tha se çështjet që lidhen me eksportet e grurit nga Ukraina mund të zgjidhen, por Ukraina duhet të çminojë ujërat e saj për të siguruar kalimin e sigurt të anijeve.
“Nëse Ukraina është gati të nisë aktivitetet e çminimit, atëherë ne jemi gati për këtë [për zgjidhjen e çështjeve] gjithashtu”, tha ai.
Lavrov përsëriti se Rusia është portretizuar në dritën e gabuar, dhe se çdo anije që dëshiron të përdorë korridoret është e lirë të veprojë “sido që të duan”.
Burimi i lajmit: CNN. Përshtatur nga Tirana Today
