Udhëheqësit ndërkombëtarë duhet të përgatiten për pasojat afatgjata të luftës, pasi konflikti do të zgjasë, ka deklaruar Ministri i Jashtëm i Francës. Duke folur teksa mbërriti për ditën e dytë të samitit të G7 në Gjermani, Ministri i Jashtëm francez Jean-Yves Le Drian tha se liderët tani duhet të merren me luftën në Ukrainë, si një konflikt afatgjatë që do të sjellë pasoja të rënda në mbarë botën.
“Unë do të theksoja gjithashtu se ne tani duhet të merremi me një konflikt që do të zgjasë, dhe për këtë arsye gjithashtu të merremi në afat të gjatë me pasojat e këtij konflikti në nivel ndërkombëtar, dhe veçanërisht në fushën e sigurisë ushqimore”, tha ai.
Ministri i Jashtëm francez shtoi se bisedat ndërkombëtare duhet të përqendrohen në rritjen e çmimeve të ushqimeve, pasi organizatat paralajmërojnë për një krizë globale ushqimore që vjen nga lufta në Ukrainë.
Le Drian tha se vendet e G7 nuk janë në luftë me Rusinë, por se në këtë luftë “ka një agresor dhe një viktimë dhe ne po mbështesim atë që sulmohet”.
Burimi i lajmit: BBC. Përshtatur nga Tirana Today
