Jemi vetëm katër ditë para zgjedhje, por ndërkohë vijojnë shkarkimet. Është ministri i Drejtësisë, Gazment Bardhi ai që ka shkarkuar sot Drejtorin e IEVP Berat Arif Dervishi, si dhe Drejtorin e IEVP Kavajë Durim Perja.
Sipas njoftimit, vendimmarrja e ministrit Bardhi ka ardhur pas inspektimeve të realizuara nga Drejtoria e Përgjithshme e Burgjeve.
Dervishi dhe Perja u shkarkuan me motivacionin e përdorimit të veprimtarisë së institucionit për qëllime politike, pjesëmarrjes së paligjshme në fushatë zgjedhore dhe keqmenaxhimit të institucionit.
Gjithashtu, Bardhi ka pranuar po sot dorëheqjen nga detyra të Drejtorit të IEVP Elbasan, Renato Minoli.
“Ministri i Drejtësisë gjen rastit të paralajmërojë çdo zyrtarë që të mos përdorë funksionin publik për qëllime politike, sepse do të përballet me pasojat e këtij veprimi të paligjshëm, jo vetëm administrativisht, por edhe penalisht.
Ministria e Drejtësisë fton çdo qytetar që të denoncojë, të gjitha rastet e përfshirjes në fushatë apo përdorimit të funksionit publik në favor të një subjekti zgjedhor, si dhe garanton qytetarët jo vetëm për ruajtjen e anonimatit, por edhe për ndjekjen me seriozitet maksimal të këtyre rasteve, duke qenë garant i zbatimit korrekt të ligjit.
Ministri Bardhi siguron se është i vendosur në zbatimin e ligjit dhe do të veprojë me tolerancë zero për çdo veprimtari politik në kundërshtim me ligjin të punonjësve së administratës shtetërore në varësi të Ministrisë së Drejtësisë”, përfundon njoftimi.
